ភ្នំពេញ៖ ក្រសួងធនធានទឹក និងឧតុនិយម បានព្យាករថា ចាប់ពីថ្ងៃទី១ ដល់ថ្ងៃទី៤ ខែកញ្ញា ឆ្នាំ២០២៣ នៅលើផ្ទៃសមុទ្រអាចនឹងមានភ្លៀងធ្លាក់ ខ្យល់បក់បោក និងរលកសមុទ្រខ្ពស់ៗ ដែលជាហេតុនាំឱ្យមានហានិភ័យណាមួយជាយថាហេតុ។

ក្រសួងធនធានទឹកបានប្រាប់ឱ្យដឹងថា ចាប់ពីថ្ងៃទី១ ដល់ថ្ងៃទី៤ ខែកញ្ញា នៅតំបន់មាត់សមុទ្រ នឹងអាចមានភ្លៀងធ្លាក់ជាប់ ជាបន្តបន្ទាប់ ពីបង្គួរទៅច្រើន លាយឡំផ្គរ រន្ទះ និងខ្យល់កន្ត្រាក់។ នៅលើផ្ទៃសមុទ្រមានភ្លៀង ខ្យល់បក់បោក និងរលកសមុទខ្ពស់ៗ។

ហេតុដូច្នេះ ក្រសួងធនធានទឹកបានអំពាវនាវដល់ពលរដ្ឋប្រុងប្រយ័ត្ន ចំពោះគ្រោះថ្នាក់នានាដែលអាចកើតមានជាយថាហេតុ។

បើតាមសេចក្តីប្រកាសរបស់ក្រសួងធនធានទឹកកាលពីថ្ងៃចន្ទទី២៨ ខែសីហា កម្ពុជាទទួលរងឥទ្ធិពលប្រព័ន្ធសម្ពាធទាបអូសបន្លាយលើភាគខាងជើងប្រទេសថៃ ឡាវ និងវៀតណាម រួមជាមួយនឹងឥទ្ធិពល់ខ្សោយពីព្យុះទីហ្វង ឈ្មោះ «សាវឡា» ស្ថិតនៅខាងកើតនៃភាគខាងជើងប្រទេសហ្វីលីពីន ដែលព្យុះនេះនឹងដើរចូលដល់ភាគអាគ្នេយ៍ប្រទេសចិននៅថ្ងៃទី២ ខែកញ្ញា។

បាតុភូតទំាងនេះហើយធ្វើឱ្យតំបន់ខ្ពង់រាប ទំនាបកណ្តាល និងតំបន់សមុទ្រអាចមានភ្លៀងធ្លាក់ លាយឡំផ្គរ រន្ទះ និងខ្យល់កន្ត្រាក់៕